Os nenos e nenas de Lugo desfrutaron dun desfile de disfraces infantil que repartiu moitos premios
Lugo celebrou o tradicional concurso de disfraces infantil, organizado pola Área de Cultura, Turismo e Promoción da Lingua, e os e as concursantes "despregaron a súas dotes imaxinativas con vistosas creacións nun desfile seguido por numerosas veciñas e veciños", explican desde a área de Goberno.
Así, a festa non faltou durante un desfile moi animado con celebradas coreografías nas que os participantes fixeron gala de gran imaxinación con elaborados traballos como o Monstruo das Galletas, os Minions ou Super Mario. Nas personaxes nas que se inspiraron os nenos lucenses tivo un enorme peso a reciclaxe e o coidado do medio ambiente.
Durante a deliberación do xurado, formado por Alejandro Carro, profesor da EASD Ramón Falcón; Jose Luíz Bermúdez, secretario da Asociación Cultural Curuxan, e Ana María Carreira, dramaturga e actriz, diractora do Grupo Ubú Teatro; a festa continuou coa animación de Patti Difusa.
Nenos e nenas premiados
Con respecto á categoría de disfraces individuais, na que se inscribiron 8 nenas e nenos, os gañadores foron Dando a Nota, de 11 anos, cun premio por valor de 100 euros; O coche Transformer, de 6 anos cun premio por valor de 80 euros, e O Xardín Segredo, 6 anos, cun premio por valor de 50 euros.
Na categoría de disfraces por parellas anotáronse 5 participantes, e destes, tres foron os premiados: Cotorras, de 6 anos, cun premio por valor de 150 euros; Lilo e Stich, de 7 e 11 anos, cun premio por valor de 120 euros, e Os contos da Infancia, de 2 anos, cun premio por valor de 90 euros.
O desfile rematou co paseo das 13 comparsas, nas que participaron ducias de nenos e nenas e "que resultou por momentos moi espectacular debido aos elaborados e orixinais traxes deseñados, así como polas animadas coreografías", explican. Así, os premios foron repartidos a Pequeniños pero esenciais, cun premio por valor de 240 euros; As pequenas esquimós chegan a Lugo, cun premio por valor de 180 euros, e A patrulla canina, cun premio por valor de 140 euros.