Falece a alcaldesa de Lugo, Paula Alvarellos, despois de sufrir un infarto
A alcaldesa de Lugo, Paula Alvarellos, faleceu despois de sufrir un infarto este venres xusto antes da lectura do pregón do Entroido, que foi suspendido.
Nun primeiro momento, foi atendida por compañeiras da Corporación municipal ata que chegou a ambulancia que a levou ao HULA para facerlle as probas pertinentes, xa que ao principio pensaban que podía ser un mareo resultado da forte gripe que atravesaba e da que deu conta durante o pleno municipal celebrado o xoves.
Porén, despois dos estudos realizados, determinouse que a causa do esvaecemento fora un infarto, polo que foi trasladada posteriormente ao CHUAC por se se requiría unha actuación cirúrxica, pero debido ás complicacións durante a noite, acabou falecendo.
LOITO OFICIAL
O Concello de Lugo declara tres días de loito oficial no termo municipal desde as 13.00 horas do día de hoxe, sábado, 1 de marzo, ata as 13.00 horas do martes 4 de marzo.
Durante este período, a bandeira do Concello ondeará a media asta no exterior da casa consistorial e no resto das dependencias municipais.
Así mesmo, suspéndense todos os actos oficiais organizados polo concello, en particular con motivo do Entroido, ata a finalización do loito oficial.
Ademais, convocan un minuto de silencio, hoxe, sábado 1 de marzo, ás 20.00 horas, como mostra de pesar polo falecemento de Paula Alvarellos, alcaldesa da cidade.
Tamén, o salón de plenos, onde se instalará un libro de condolencias, permanecerá aberto hoxe a partir desa hora e ata as 22.00 horas, así como mañá, domingo, e o luns, de 10.00 a 14.00 horas, para que aqueles cidadáns e representantes institucionais que así o desexen se acheguen para amosar as súas mostras de afecto.
PESAR DOS COMPAÑEIROS
Desde a Corporación municipal e o equipo de Goberno de Lugo lamentaron esta perda "irreparable" e agradecen "de corazón todas estas mensaxes de apoio, que confirman a pegada que deixou en tantas persoas". Así, din que "quen tivo a sorte de compartir con ela esta aventura, de traballar ao seu lado, sabe que Paula Alvarellos foi moito máis que unha alcaldesa. Era unha persoa próxima e empática, alguén que sabía escoitar, unir equipos e crear espazos de confianza e motivación. Sempre honrada e íntegra, o seu compromiso co Concello e coa súa xente ía máis alá da responsabilidade institucional: era unha convicción persoal, unha forma de entender a política desde a proximidade e a humanidade".
O PSdeG manifestou a súa profunda dor polo pasamento de Paula Alvarellos, alcaldesa de Lugo e destacada compañeira dentro da formación. Desde o PSdeG destacaron a súa figura non só como unha gran alcaldesa, sempre comprometida cos problemas da cidadanía e o desenvolvemento da cidade, senón tamén como unha militante traballadora, próxima e leal, sempre disposta a sumar polo ben común. "A súa perda é dura, inxusta e inesperada, pero a súa pegada quedará en Lugo e no noso partido", sinalaron desde a formación socialista. Así mesmo, aseguraron que a mellor forma de honrar a súa memoria será continuar traballando con responsabilidade e compromiso pola cidade que tanto amou. O PSdeG transmitiu o seu afecto e apoio á familia de Alvarellos, ás súas amizades e a toda a veciñanza de Lugo neste momento de dor.
Desde o PSOE da provincia de Lugo tamén quixeron expresar o seu agarimo cara a Paula Alvarellos, "unha socialista comprometida e unha servidora pública incansable. Hai un ano asumiu a Alcaldía con ilusión, responsabilidade e a mesma paixón que sempre puxo ao servizo do ben común. A súa pegada queda en cada proxecto no que se implicou, en cada veciño e
veciña aos que escoitou e en cada avance que conseguiu para Lugo".
Lara Méndez expresou que "é un día de moita dor polo falecemento de Paula. Foise unha amiga, unha colaboradora estreita coa que compartín charlas, risas e anos de xestión, unidas polo noso amor a Lugo. Non e xusta a túa pronta marcha, pero deixas unha fonda pegada en todos nós e na cidade á que lle dedicaste tantos anos da túa vida, cun compromiso inquebrantable".
Jose Ramón Gómez Besteiro, roto de dor, despide tamén a Paula, "unha boa amiga, alcaldesa de Lugo e unha muller que viviu por e para a sua cidade. Inxusto, demasiado pronto, demasiado duro. Grazas polo teu exemplo, o teu paso firme contra as inxustizas e o teu apoio nos mellores e peores momentos da miña vida".
O presidente do Goberno de España, Pedro Sánchez, "conmocionado e profundamente triste polo repentino falecemento da alcaldesa", expresou o seu apoio a familiares e amigos e falou de Paula Alvarellos como "progresista, loitadores e comprometida con Lugo".
Tamén o presidente da Xunta, Alfonso Rueda, lamentou o falecemento da alcaldesa de Lugo, Paula Alvarellos, e alabou que sempre traballou por Lugo con "lealdade e dedicación".
Desde a Deputación Provincial de Lugo, expresaron a súa "profunda tristura polo falecemento de Paula Alvarellos Fondo, que foi unha servidora pública comprometida, que dedicou a súa traxectoria ao progreso da súa cidade e ao benestar da súa veciñanza. O seu traballo incansable, xa desde a súa etapa como concelleira, e posteriormente como alcaldesa, reflicte a súa vocación de servizo e a súa paixón por Lugo".
Pola súa parte, o BNG de Lugo tamén mostrou o seu apoio á familia e persoas achegadas á alcaldesa e ás compañeiras e compañeiros do Grupo Municipal do PSdeG "o noso máis sentido pésame polo falecemento de Paula Alvarellos".
O Partido Popular de Lugo tamén trasladou o seu pésame e desde o grupo municipal explicaron que "xuntos temos que ser capaces de sobrepoñernos a esta terrible noticia. A súa perda lévanos a reflexionar sobre a importancia do compañeirismo, do respecto e do compromiso co servizo público. Hoxe, máis que nunca, debemos lembrar que as diferenzas políticas non empañan o afecto e a admiración que sentimos entre compañeiros".
Desde Esquerda Unida tamén trasladaron "as nosas máis sinceras condolencias e o noso sentido pésame polo falecemento de Paula Alvarellos, á súa familia, ao Partido Socialista de Galicia e ao seu grupo municipal", sostiveron.
Pola súa parte, desde Lugo Monumental tamén transmitiron á familia de Paula Alvarellos, aos seus amigos, a toda a Corporación e a todos os veciños o noso máis sincero e sentido pésame".
A Confederación de Empresarios de Lugo (CEL) sumouse ás condolencias, destacando dePaula Alvarellos o seu carácter afable e aberto, sempre disposta a escoitar as ideas, propostas e inquietudes dos empresarios de Lugo e fomentar proxectos que redundasen no desenvolvemento social e económico da cidade.
A Asociación de Veciños Centro de Lugo únese á dor pola perda da alcaldesa Paula Alvarellos, "que deixa un baleiro irreparable". Así, din que durante o seu mandato, Paula amosou un "compromiso persistente e inquebrantable co benestar dos nosos veciños e o desenvolvemento da nosa cidade. Sempre estivo disposta a escoitar e atender as inquedanzas da nosa asociación, trasladándolle as demandas da veciñanza".
Dende a plataforma SOS Milagrosa Lugo Norte tamén expresaron o seu pesar polo falecemento da alcaldesa, poñendo en valor "a súa etapa como concelleira e posteriormente como alcaldesa, nas que demostrou ser unha muller afouta e comprometida coa cidade. Cun carácter firme e decidido, era unha muller de trato próximo e amábel, sempre disposta atender aos veciños", sostiveron.
PAULA ALVARELLOS (PONTECESO, 1963)
Paula Alvarellos Fondo, natural de Ponteceso e nada en 1963, formouse en Dereito na Universidade de Santiago de Compostela, completando a súa especialización cun Mestrado en Tributación e Asesoría Fiscal no Centro de Estudos Financeiros.
Ao longo da súa carreira profesional, destacou como docente no Mestrado da Avogacía da USC en Lugo e como colaboradora en IFFE Business School. Exerceu tamén como avogada en Lugo para ACOUGA e foi membro do Consello Social da USC, ademais de desenvolver unha ampla traxectoria como avogada e mediadora.
O seu compromiso coa política levouna a dar o salto ao PSOE lugués en 2019, ano no que, tras as eleccións municipais, pasou a formar parte do Goberno de Lara Méndez como tenente de alcaldesa. O seu labor institucional consolidouse cando, en xaneiro de 2024, asumiu a Alcaldía de Lugo, en substitución de Méndez, quen deixou o cargo para presentarse ás eleccións ao Parlamento galego.
Durante o seu mandato, traballou en proxectos clave para a cidade, en colaboración co BNG, formación que tamén lamenta profundamente a súa perda na cidade de Lugo, que hoxe está de loito.