A ANPA do CEIP Virxe da Luz de Portomarín protestou contra o recorte de profesorado
A ANPA do CEIP Virxe da Luz de Portomarín cortou a ponte da estrada LU-633 de Sarria a Portomarín como sinal de protesta polos recorte de profesorado que se prevé para o curso 2024/2025.
Dito acto foi comunicado á Subdelegación do Goberno, que mandou dúas patrullas para garantira a seguridade. Despois a protesta continuou subindo a Capela das Neves, a Rúa Compostela ata chegar á Praza do Concello.
Os manifestantes quixeron dar visibilidade á súa protesta cortando unha estrada do Camiño de Santiago e entrando no pobo polo itinerario que segue o Camiño de Santiago, de feito, varios peregrino uníronse á protesta.
Esta protesta enmárcase nas reivindicacións que está a realizar a ANPA de Portomarín debido a que para o curso 2024/2025, a pesar de ter un incremento de matrícula, haberá só 2 aulas de Primaria en lugar das 3 que temos actualmente.
A Xunta de Galicia fai un recorte de profesorado ao non cubrir a praza de especialista de inglés, polo que en lugar dos 5 profesores actuais, haberá 4 profesores. Desta maneira, agrúpase o alumnado de Primaria de tres cursos: 1º, 2º e 3ª nunha clase; e 4º, 5º e 6º noutra; o que sen dúbida supón unha perda de calidade do ensino repercutindo no futuro dos nenos e nenas de Portomarín.
A Consellería de Educación incumpre o seu propio Acordo de Melloras respecto ao rateo do 11/10/23, que recolle que non se poden agrupar en Educación Primaria máis de 12 alumnos de Primaria cando pertenzan a diferentes ciclos. Na aula prevista de 1º a 3º vai haber 14 alumnos, superando o rateo acordado.
Dende a ANPA do CEIP Virxe da Luz de Portomarín, sinala a súa presidenta, Soraya González: “Non podemos permitir que se fagan recortes na educación das nosas/os fillas e fillos. Non son números, está en xogo o seu futuro. Non entendemos que se incremente a matrícula e teñamos que sufrir recortes. Só pedimos que se manteñan as condicións do curso pasado. O investimento na educación dos nenos debe ser prioritaria sobre outros gastos. De verdade, polo custe dun profesor pódese prexudicar o futuro dos nenos e a perda de servizos no rural?”
Entre as actuacións que está realizando a ANPA para evitar o recorte de profesorado, xa houbo unha manifestación o pasado día 9 de agosto, estanse recollendo sinaturas para presentar a semana que ven ante a Xunta de Galicia, xa se dispoñen de máis de 1.200, e está prevista antes do inicio do o curso escolar; unha reunión do representantes dos pais, aínda sen confirmar data, coa Xefatura Territorial de Educación da Xunta de Galicia no colexio para tratar o tema, segundo trasladou a directora á ANPA.