A artista Elena Pendás achega a Lugo a súa obra de Pop Art contemporáneo
A cidade de Lugo acollerá unha nova mostra da pintora riosellana Elena Pendás, que se inaugurará o venres 21 de marzo ás 18.00 horas na residencia de maiores Bouco.
A exposición, aberta á sociedade lucense, ofrecerá unha nova oportunidade para reencontrarse coa obra dunha das artistas máis singulares do Pop Art contemporáneo. O título é 'O romance entre o Pop e a Belle Époque', unha proposta visual que mestura elegancia e ironía, tradición e vangarda.
Elena Pendás, profesora da Escola de Arte Ramón Falcón, conta cunha dilatada traxectoria vinculada ao Pop Art, estilo que cultivou especialmente nos primeiros anos do século XXI.
A súa obra foi sempre considerada unha proposta audaz e provocadora, afastándose do Pop estadounidense de figuras como Lichtenstein ou Wesselmann, para reivindicar unha muller contemporánea, autónoma e con voz propia, fronte aos estereotipos femininos dos anos 50 e 60. A artista soubo imprimir á súa obra unha linguaxe directa, vibrante e cargada de humor, con cores intensas, liñas marcadas e mensaxes cheas de vitalidade.
RELACIÓN CO CRÍTICO DA ARTE MANUEL ÁLVAREZ
A exposición estará comisariada polo escritor e crítico de arte Manuel Álvarez Prieto, experto en historia e socioloxía da arte, coñecido tamén por ser xurado internacional da Primeira Trienal Latina de 1992.
A relación artística entre Elena e Manuel remóntase ao ano 2006, cando ambos colaboraron nunha exitosa xira expositiva pola Cornisa Cantábrica, dende Galicia ata Euskadi. A mostra foi amplamente seguida polos medios, destacando a súa culminación no prestixioso Gran Hotel María Cristina de San Sebastián, onde a crítica puxo en valor a mestura do Pop Expresionista co modernismo da jugendstil que define o estilo de Pendás.
Para Manuel Álvarez Prieto, esta mostra debe servir tamén como punto de inflexión: “Elena Pendás debe retornar á creación activa”, afirma o comisario, unha opinión compartida por antigos alumnos da artista, que consideran que a súa experiencia e visión poderían achegar unha nova evolución ao Pop Art no século XXI.
O público lucense poderá, así, desfrutar dunha exposición que promete sorprender e dialogar co espectador, recuperando a forza expresiva dunha creadora que nunca deixou de marcar territorio.