A Banda Municipal de Lugo volve soar no San Froilán tras cinco anos de silencio
A Banda Municipal de Lugo recuperou a súa presenza nas festas do San Froilán, despois de cinco anos sen ofrecer concerto durante a gran celebración do outono galego.
O regreso tivo lugar no Templete da Música da Praza Maior, un escenario simbólico que forma parte da historia e da identidade da agrupación musical.
A concelleira de Cultura, Turismo e Promoción da Lingua, Maite Ferreiro, destacou que “o concerto de hoxe é un primeiro paso para recuperar a normalidade dentro da Banda e da Escola de Música”, e cualificou esta volta como “un dos principais eventos do San Froilán 2025”.
Ferreiro lembrou tamén que, tras o acordo aprobado onte na Xunta de Goberno, o Concello iniciou xa o proceso para recuperar o funcionamento habitual da Escola Municipal de Música e activar o novo curso “o antes posible”.
A edil subliñou que o obxectivo é devolver a estabilidade a unha das institucións culturais máis queridas da cidade e garantir a continuidade da súa actividade formativa e artística.