A casa museo de Manuel María acolle un concerto ao redor da tradición oral feminina
Proxecto Consoante con Branca Villares e a colaboración de Pablo Pintor presentan este sábado, 5 de abril, ás 20 h, na Casa-Museo Manuel María, Por que cantan as mulleres?, un concerto didáctico ao redor da tradición oral feminina en que debullan por que cantan, o que cantan e como cantan.
Partindo e entendendo os contextos onde tivo lugar a creación e a transmisión oral das mulleres cantadoras, o concerto, entre outras cousas, centrará a atención das persoas que asistan en por que se excluíu a tradición oral do canon cultural, e fará un percorrido polos distintos xéneros e temáticas das cantigas, así como polas particularidades da oralidade das distintas zonas de Galiza.
O proxecto Consoante, composto por pandereteiras de distintas entidades onde dá aulas Branca Villares, a propia Branca (narrativa, voz, pandeira e percusións de man) e Pablo Pintor (zanfona, clarinete e gaita) desenvolverán un concerto interactivo en que ademais de desfrutar co relato e as cantigas, o público asistente participará cantando e dialogando cos sons e os ritmos.
A actividade é de entrada libre até completar o aforo, mais é necesario reservar en contacto@casamuseomanuelmaria.gal ou no WhatsApp 698177621