A CEL aborda os retos do novo rexistro dixital de xornada nunha sesión informativa
A Confederación de Empresarios de Lugo (CEL) reuniu na súa sede central a preto dunha trintena de persoas nunha sesión informativa centrada no rexistro de xornada e nos retos que traerá a futura implantación do rexistro dixital obrigatorio, unha cuestión de gran impacto no ámbito laboral e de recursos humanos e que se atopa actualmente en fase de tramitación normativa.
O secretario xeral da CEL, Jaime López, foi o encargado de inaugurar o encontro, no que sinalou que a nova regulación “leva máis de medio ano en tramitación” e que, malia atoparse agora nun escenario de incerteza tras o recente ditame desfavorable do Consello de Estado, o máis probable é que o Ministerio de Traballo publique finalmente a norma. Neste contexto, subliñou a importancia de que as empresas “estean o máis informadas e preparadas posible”.
A xornada estruturouse arredor da análise do marco xurídico actual en materia de rexistro de xornada e dos principais desafíos que implicará a súa reforma, que introducirá a obrigatoriedade do rexistro dixital.
Para afondar nestas cuestións, a sesión contou coa participación de Elena Mancha, inspectora de Traballo e Seguridade Social na Coruña; Catarina Capeáns, socia responsable da área de Dereito Laboral de Vento Abogados & Asesores; e Jorge Cebreiros, CEO de InfoJC.
Elena Mancha realizou un repaso do marco legal vixente, regulado polo Estatuto dos Traballadores, destacando as diferenzas entre os rexistros de xornada en contratos a tempo completo e parcial, así como o procedemento de control por parte da Inspección de Traballo e os cambios que introduciría o proxecto de Real Decreto en tramitación.
Pola súa banda, Catarina Capeáns centrou a súa intervención na resolución de dúbidas prácticas relacionadas co cómputo do tempo de traballo efectivo, a interpretación da xurisprudencia e o correcto enchemento do rexistro. Neste sentido, subliñou a necesidade de que as empresas conten cun protocolo claro que defina que se considera tempo de traballo e como debe rexistrarse correctamente.
Finalmente, Jorge Cebreiros abordou as solucións tecnolóxicas dispoñibles para cumprir coa futura obrigación do rexistro dixital, destacando que estas ferramentas non só permiten adaptarse á normativa, senón que tamén facilitan a análise de datos útiles para mellorar a xestión empresarial e contribuír a reducir o absentismo laboral.