A CEL organiza unha xornada sobre ciberseguridade para protexer ás empresas lucenses
A Confederación de Empresarios de Lugo (CEL), co apoio da Deputación de Lugo, organiza a xornada informativa titulada “Ciberseguridade: O reto de protexer a túa empresa”, que terá lugar o próximo 25 de xuño na sede central da CEL en formato presencial.
Esta iniciativa reunirá un amplo grupo de expertos da Policía Nacional e de empresas privadas para analizar a situación da ciberdelincuencia na provincia e as medidas preventivas que as empresas poden adoptar.
Segundo datos do Ministerio do Interior, os ciberdelitos en Lugo duplicáronse durante o último quinquenio, superando os 2.000 casos anuais.
A CEL destaca que a ciberdelincuencia provoca graves efectos nas empresas, como perdas financeiras directas e indirectas, danos na reputación, interrupción das operacións e posibles sancións legais, chegando incluso a comprometer a viabilidade das compañías. Por iso, para a organización empresarial resulta prioritario coñecer esta realidade en detalle e tomar medidas de protección.
O programa da xornada inclúe a intervención do inspector Héctor Pérez, xefe do Grupo de Delincuencia Económica e Tecnolóxica da Comisaría Provincial de Lugo, que falará sobre “A actualidade da ciberdelincuencia detectada no ámbito lucense”. Tamén participarán expertos das empresas especializadas en seguridade dixital Forensic and Security e Cloud.gal, que abordarán as “Actuacións de evitación e reparación”.
A sesión rematará cunha mesa redonda moderada por Iago González, da empresa tecnolóxica InCentea, na que participará o inspector xefe da Comisaría de Lugo, José Aneiros, xunto con representantes de tres empresas punteiras da provincia, que compartirán as súas experiencias e visións sobre os riscos e a xestión da ciberseguridade nas empresas lucenses.