A CIG concentrouse en Lugo para denunciar as altas médicas
A Confederación Intersindical Galega (CIG) denunciou o “aumento desmesurado e abusivo” das altas médicas durante unha concentración celebrada fronte ao edificio do Instituto Nacional da Seguridade Social en Lugo.
O secretario comarcal de CIG Lugo-A Mariña, Antonio Niño Saavedra, afirmou durante o acto que o obxectivo de “reducir as baixas médicas e os longos períodos de recuperación” é, en realidade, diminuír o absentismo laboral.
Criticou duramente as actuacións da Inspección médica da Seguridade Social e do Sergas, aos que cualificou de realizar unha “persecución sistemática e abusiva” contra os traballadores.
Segundo Niño, cúlpase de xeito inxusto aos empregados da súa situación de incapacidade temporal, cando “na maioría dos casos son as malas condicións laborais e a deficiente atención do sistema sanitario público as verdadeiras responsables”.
O representante sindical tamén sinalou que na provincia de Lugo “temos unha poboación activa envellecida, o que conleva un maior número de baixas”. Por iso, considerou que as altas médicas están xestionándose baixo un “criterio económico” e non por razóns médicas.
“Quen deberían velar pola nosa saúde son agora os mesmos que nos sitúan nunha situación de vulnerabilidade”, concluíu Niño.