A CIG convoca unha manifestación en Lugo polo Día da Clase Obreira Galega
A Confederación Intersindical Galega (CIG) convocou unha manifestación en Lugo o vindeiro 10 de marzo con motivo do Día da Clase Obreira Galega. A mobilización partirá ás 20:00 horas desde o Edificio Sindical da Ronda da Muralla e a central sindical fai un chamamento á clase traballadora da comarca para participar nesta xornada de reivindicación.
O 10 de marzo é unha data de especial significado para o movemento obreiro galego, xa que lembra os feitos acontecidos en Ferrol en 1972, cando a represión franquista contra unha mobilización obreira acabou coa vida dos traballadores Amador Rey e Daniel Niebla. Desde entón, esta xornada converteuse nun símbolo da loita polos dereitos laborais e pola dignidade da clase traballadora en Galiza.
Neste 2026, a CIG chama á mobilización fronte á perda de poder adquisitivo, a precariedade laboral e o encarecemento do custo da vida, que, segundo denuncia, afectan de maneira directa á maioría social. A central sindical sostén que, mentres as grandes empresas continúan a incrementar os seus beneficios, amplos sectores da clase traballadora seguen a sufrir salarios insuficientes, dificultades para acceder á vivenda e unha crecente precarización das condicións laborais.
Entre as principais reivindicacións da mobilización figuran a suba xeral dos salarios, situando o salario mínimo no 60 % do salario medio, a redución da xornada laboral cara ás 35 horas semanais e a derrogación das reformas laborais que consideran regresivas. Ademais, a organización reclama o reforzo dos servizos públicos e o desenvolvemento de políticas industriais e de emprego que garantan traballo digno en Galiza.
A central sindical reafirma tamén nesta xornada o seu compromiso coa defensa da paz, cun posicionamento antiimperialista e co dereito dos pobos á soberanía e á autodeterminación. Neste sentido, considera que a escalada de conflitos internacionais e o incremento do gasto militar están a desviar recursos públicos que deberían destinarse a garantir dereitos sociais, servizos públicos e condicións de vida dignas para a maioría social.
Por todo isto, a CIG subliña que o 10 de marzo debe ser tamén unha xornada de mobilización para avanzar na conquista de dereitos laborais e sociais, así como para reclamar maiores competencias para Galiza que permitan desenvolver políticas propias nos ámbitos económico, laboral e social.
A central sindical anima á cidadanía e ao conxunto da clase traballadora da comarca de Lugo a participar na manifestación convocada para este 10 de marzo, ás 20:00 horas, con saída desde o Edificio Sindical da Ronda da Muralla, co obxectivo de facer escoitar a voz da clase traballadora galega.