A Deputación de Lugo activa o dispositivo de neve na Montaña para garantir a circulación
A Deputación de Lugo está a traballar estes días nas estradas da Montaña para despexar a neve e facilitar a circulación nesta zona da provincia. O dispositivo desplegado pola institución conta con 12 máquinas, entre quitaneves e pickups, e 24 operarios centrados nos concellos de Pedrafita, Cervantes e Folgoso do Courel, onde esta mañá se acumularon ata 7 centímetros de neve.
Onte á noite, o operativo tivo que asistir a tres vehículos que quedaron atascados na parroquia de Visuña, en plena Serra do Courel, preto do límite coa provincia de León. Nos puntos máis altos da provincia, en Folgoso do Courel, Pedrafita do Cebreiro e Cervantes, rexistráronse as maiores acumulacións.
O dispositivo reactivouse hoxe ás 7:00 horas, coas quitaneves abrindo paso ao transporte escolar para garantir a chegada dos nenos e nenas aos centros educativos. Segundo informan os técnicos, non hai estradas pechadas ao tráfico nesta hora e o peor da fronte fría que afecta Galicia parece superado.
A Deputación de Lugo conta cun operativo invernal de 112 persoas e 64 máquinas para garantir a seguridade nos máis de 4.200 quilómetros de estradas provinciais. Ademais, dispón de 420 toneladas de sal distribuídas en 12 silos e traballa coordinadamente con oito empresas dedicadas á conservación e mantemento da rede viaria.