A Deputación de Lugo celebrará unha festa cos Bolechas para inaugurar o Nadal en San Marcos
A Deputación de Lugo prepara para este xoves, 4 de decembro, unha celebración especial coa presenza dos Bolechas para dar comezo ao Nadal en San Marcos. A actividade, aberta ao público e de carácter gratuíto, arrancará ás 19:00 horas coa presentación do novo volume da coñecida serie infantil, titulado Unha viaxe por Lugo. Unha provincia natural.
A historia xira en torno a Marta, que decide organizar unha festa de inspiración normanda en Lugo polo seu aniversario e invita aos Bolechas a descubrir con ela algúns dos espazos naturais máis representativos da provincia. O relato será presentado no Salón de Actos do Pazo de San Marcos, onde tamén participarán varios dos personaxes que conforman o grupo, entre eles Braulio, Carlos, Sonia e Pili, que manterán interaccións co público infantil.
A partir das 19:30 horas, a Praza de San Marcos encherase de música co repertorio de panxoliñas interpretado polo Orfeón Lucense. A continuación, o presidente da Deputación, José Tomé Roca, procederá ao acendido do alumeado de Nadal, tanto exterior como interior, acompañado polos propios Bolechas. A coral continuará coa interpretación de nadaliñas ata as 20:30 horas, amenizando a todas as persoas presentes na praza.
Este ano, a ornamentación da fachada de San Marcos volverá empregar iluminación LED de alta eficiencia e incorporará figuras dos Reis Magos, diversas estrelas, copos de neve e cortinas luminosas en disposición horizontal e vertical. Como novidade, colocaranse dous arcos de luz na entrada principal, xunto con outros elementos decorativos. O interior do Pazo tamén contará cunha ambientación especial con motivos típicos destas datas.