A Deputación de Lugo reforzará o apoio ao tecido asociativo dos Ancares en 2025
A Deputación de Lugo reforzará o apoio ao tecido asociativo dos Ancares, incrementando no 2025 as partidas das axudas destinadas a estas entidades asociativas que traballan nesta Reserva, no marco do compromiso do Goberno provincial con estes espazos, co rural e co medio ambiente
Así o fixo o presidente, José Tomé, nun encontro que se celebrou no Edificio Multiusos de San Román de Cervantes cos representantes dunha decena de colectivos da Montaña que este 2024 contribuíron ao desenvolvemento sostible do territorio grazas a un investimento de 50.000 euros da Deputación.
“Grazas ao voso esforzo, estades contribuíndo a que a Reserva da Biosfera dos Ancares se consolide como un espazo de referencia en termos de protección ambiental e como modelo de desenvolvemento equilibrado e inclusivo”, valorou Tomé Roca.
Así, destacou o compromiso da Deputación co tecido asociativo da provincia e valorou que o seu “dinamismo e variedade” constitúen “unha das grandes fortalezas desta provincia no desenvolvemento do seu futuro".
Tamén, sinalou o despoboamento, o acceso a recursos e servizos e a necesidade de crear oportunidades para a mocidade como algúns dos retos dun territorio que ten unha importancia que “vai máis alá das fronteiras de Lugo, xa que se trata dun espazo recoñecido internacionalmente pola súa riqueza natural, cultural e paisaxística”.
O presidente puxo en valor os diferentes proxectos nos que están a traballar este ano as diferentes entidades, “todos vinculados ao medio ambiente e ao rural que poñen en valor o patrimonio natural e cultural e contribúen, desta forma, ao desenvolvemento sostible aproveitando os recursos propios da contorna”.
Cada unha destas iniciativas contou cunha achega da institución provincial de entre os 1.000 euros e os 7.000 euros para o seu desenvolvemento. E sinalou, como exemplos, a asociación que traballa no coidado dos teitos das pallozas, ou ao colectivo que impulsa a marcha nórdica contribuíndo a difundir unha práctica deportiva e saudable no territorio.
Entre os participantes do encontro reuníronse representantes das asociacións de Castaño y Nogal (Becerreá), Asociación Cultural Deportiva Chao de Sebes (Becerreá), Asociación Galega de Custodia do Territorio (Lugo), Asociación Cultural O Teixeiro(Cervantes), Asociación Ser (Navia de Suarna), Asociación Teitos de Piornedo (Cervantes), o CPI Cervantes, Asociación Xuvenil Cultural A Cambela (Cervantes), Asociación Rente ao Couce (Becerreá), Asociación Montes e Vales (Baleira) e a Sociedade Micolóxica Lucus.