A Deputación impulsa o silvopastoreo nos montes comunais da parroquia de Outeiro
A Vicepresidencia da Deputación de Lugo, a través da súa área de Rural, destinará 30.000 euros para mellorar as infraestruturas e servizos nos montes comunais da parroquia de San Salvador de Outeiro.
O obxectivo desta inversión é reforzar o aproveitamento multifuncional do monte, promovendo o silvopastoreo e a xestión micolóxica, ademais de contribuír á prevención de incendios.
O deputado de Rural, Daniel García, e o concelleiro de Infraestruturas de Lugo, Alexandre Penas, visitaron este venres a parroquia para reunirse coa comunidade de montes e abordar os proxectos que se desenvolverán con esta axuda económica.
Entre as actuacións previstas inclúse a mellora dun camiño que facilitará o pastoreo rotatorio do monte e o estudo dun plan para regular e sinalizar as zonas con aptitudes micolóxicas.
Durante a visita, tanto García como Penas destacaron a singularidade da comunidade de montes de Outeiro pola súa proximidade á cidade de Lugo. Ambos valoraron positivamente a súa xestión multifuncional, que combina o uso forestal co silvopastoreo, permitindo aproveitar os recursos naturais do monte e reforzando a súa función como barreira contra os incendios forestais.
A comunidade de montes de Outeiro está formada por 13 comuneiros e comuneiras que xestionan preto de 200 hectáreas de terreo. Nesta superficie compatibilizan o uso forestal coa cría de gando vacún, cabalar e ovino, consolidando un modelo sostible de aproveitamento do monte.