A Deputación inicia as obras de restauración do paseo do río Rato cun investimento de máis de 175.000 euros
Comezan as obras de restauración da contorna do río Rato tras os importantes danos causados pola borrasca Olivier o pasado mes de abril, tal e como anunciou o presidente da Deputación de Lugo, José Tomé Roca.
A actuación conta cun investimento de 175.286 euros e un prazo de execución de tres meses, con cargo ao fondo de continxencia destinado a emerxencias do orzamento provincial.
Os traballos céntranse na recuperación das marxes mediante técnicas de bioenxeñería e na construción de diques tradicionais, así como no recheo e reparación dos camiños do paseo fluvial. Tamén se procederá á reposición de pontes e pasarelas de madeira que foron arrastradas pola corrente.
A empresa pública TRAGSA será a encargada da execución, escollida pola súa experiencia en intervencións ambientais e pola urxencia da situación.
José Tomé destacou o valor ambiental, educativo e social do espazo para a cidade de Lugo e asegurou que a resposta da Deputación foi “áxil e responsable”. Nada máis producirse a borrasca, encargouse un informe técnico ao servizo de Medio Ambiente, que permitiu identificar os principais danos e solicitar os permisos á Confederación Hidrográfica.
Entre os principais estragos detectados figuran a desaparición do firme dos camiños, a caída de muretes e escolleras que protexían as marxes, así como a acumulación de terra, pedras e vexetación sobre os elementos urbanos.
Para a reparación, será necesario empregar máis de 1.400 metros cúbicos de xabre e 205 de cachote, repoñer cinco pasarelas de madeira, tramos de varandas, valados e mesmo un banco, ademais de restaurar a senda pivotada que conecta co área da Tolda de Castela. A intervención inclúe tamén a aplicación de técnicas naturais para a reconstrución das marxes do río, nun total de 87,5 metros cadrados de paseo e 66 metros de escollera.
PASARELAS
En total, serán seis as pasarelas que deberán ser renovadas total ou parcialmente, así como unha sección da senda de madeira pivotada que conecta co lugar da Tolda de Castela.
Unha das intervencións afectará á pasarela situada xunto ás casetas de madeira utilizadas pola Deputación de Lugo para o mantemento das zonas verdes provinciais. Neste caso, tratarase de substituír por completo a varanda de seguridade dunha ponte de sete metros de longo e dous de ancho, que quedou moi deteriorada.
Tamén se renovará integramente a estrutura e a varanda da pasarela que cruza no punto de intersección de varios camiños do paseo, cunha dimensión de sete metros por un e medio. No mesmo sentido, será substituída a pasarela de acceso ao Centro de Permacultura, que medía seis metros de longo e tamén un e medio de ancho, ao presentar danos na totalidade da súa estrutura.
Na contorna da cascada do Rato, as dúas pasarelas existentes foron severamente afectadas pola forza da auga. Unha delas, situada río arriba, foi desprazada varios metros e quedou inutilizable, polo que será reposta por outra de características semellantes: cinco metros de lonxitude e un e medio de ancho, incluíndo a súa varanda. A outra, instalada xusto antes da fervenza, foi arrincada dos seus apoios e tamén deberá ser substituída por completo, xa que tiña 5,7 metros de longo por 1,5 de ancho.
Finalmente, na zona que comunica o Paseo do Rato coa Tolda de Castela, os danos na senda pivotada afectan a unha superficie de 14 metros cadrados, que terán que ser repostos debido ao deterioro estrutural detectado.