A Despensa do Saa acolle o coloquio 'De conversa con Christian Villamide'
O sábado 3 de maio, ás 19:30 horas, celebrarase na Despensa do Saa o coloquio 'De conversa con Christian Villamide', un encontro aberto ao público presentado pola escritora e xestora cultural Ánxela Gracián.
O tema central será 'Territorio incómodo / territorio acomodado', un debate vinculado á exposición que o artista mantén actualmente na Galería Néboa, e que poderá visitarse ata o 31 de maio.
Durante o acto, Christian Villamide, recoñecido creador multidisciplinar, abordará a complexa relación entre o ser humano e a paisaxe, poñendo o foco na transformación do territorio e na deterioración ambiental.
O artista sinala que “o ser humano chega a prostituír a natureza, que é o que nos dá a vida”, nunha clara chamada á reflexión crítica sobre o impacto das accións humanas no medio natural.
O evento propón un espazo para o diálogo e a análise sobre a forma en que habitamos e modificamos o territorio, e forma parte das actividades paralelas á mostra artística que Villamide expón na Galería Néboa.