A Escola Lucense de Tiro con Arco brilla en Meis cun ouro, dous bronces e postos destacados
A Escola Lucense de Tiro con Arco completou unha fin de semana moi destacada nas competicións celebradas en Meis, onde tomou parte no I Trofeo Concello de Meis, organizado de maneira simultánea coa terceira xornada da Liga Galega de Sala, puntuable para o RAUS nacional.
O club logrou un brillante ouro grazas a José Ángel Otero Martínez, que se impuxo na disciplina de Longbow +50 homes tras un torneo impecable no que mantivo o liderado desde o primeiro instante.
A este éxito sumáronse dous bronces moi celebrados: o de Andrés Casaleiro, que asegurou o terceiro posto cun tiro de desempate cravado na cruz da diana ao final dunha eliminatoria moi axustada, e o de Fon Villamiel, que asinou un sólido 6-2 no set decisivo dunha rolda final nosada pero finalmente favorable ao arqueiro lucense.
A expedición completou a súa actuación con resultados igualmente significativos, entre eles os quintos postos de Áxel Fernández Arias en Recurvo Alevín Home e de Ana Isabel Villar Fernández en Recurvo Senior Muller; o oitavo lugar de María Castelo Arias en Recurvo Senior Muller; o duodécimo posto de José Barreiro López en Tradicional +50 Home; o décimo terceiro de José Luis López Jiménez en Recurvo +50 Home; o décimo cuarto de Celia Sánchez Mateos en Recurvo Senior Muller; e o vixésimo quinto de Juan Carlos Fernández Villar en Recurvo Senior Home.
No que respecta á terceira xornada da Liga Galega de Sala, a falta aínda de dúas probas para o remate da competición, os arqueiros da Escola Lucense de Tiro con Arco rubricaron tamén resultados de gran nivel: Otero Martínez liderou en Longbow +50 Home con 502 puntos; Fon Villamiel ocupou a cuarta praza en Tradicional +50 Home con 517 puntos, seguido polos 457 de José Barreiro López; Áxel Fernández Arias repetiu un quinto posto en Recurvo Alevín Home con 517 puntos; mentres que en Recurvo Senior Muller, Ana Isabel Villar Fernández foi quinta con 469 puntos, María Castelo Arias oitava con 396 e Celia Sánchez Mateos décimo cuarta con 301.
Ademais, en Recurvo Senior Home, Juan Andrés Casaleiro Piña finalizou sexto con 520 puntos e Juan Carlos Fernández Villar vixésimo quinto con 375, e en Recurvo +50 Home José Luis López Jiménez concluíu décimo terceiro con 444 puntos.