A especialista en xenómica evolutiva Ana Riesgo Gil ofrece unha charla en Veterinaria
A científica do Museo Nacional de Historia Natural de Madrid e especialista en xenómica evolutiva de invertebrados mariños, Ana Riesgo Gil, ofrece este mércores, a partir das 9.00 horas, na Sala de Xuntas da Facultade de Veterinaria do Campus Terra da USC o relatorio Reclutamento e conexión de esponxas: alicerces da resiliencia e do aprovisionamento dos ecosistemas de especies fundamentais.
Na súa exposición, que se encadra nun ciclo de relatorios organizado polo grupo de investigación Acuigen co apoio económico da Deputación de Lugo e coordinado polo profesor Manuel Vera Rodríguez, Ana Riesgo explicará como as esponxas se atopan entre os organismos sésiles máis importantes que garanten a saúde do océano nos hábitats onde se atopan, dada a multitude de servizos ecosistémicos que proporcionan, como a provisión de alta biodiversidade, a creación de estruturas tridimensionais para abrigarse, fontes de alimentos e o impacto nos nutrientes e ciclos bioxeoquímicos de C, N e Si.
Na actualidade, estes organismos sésiles están especialmente ameazados polo quecemento global, debido a enfermidades relacionadas coa temperatura, o que supón un alto risco para ecosistemas enteiros. Mesmo nos escenarios de cambio climático máis optimistas, a abundancia de esponxas e a estrutura comunitaria veranse gravemente afectadas, comprometendo así o seu papel nos ciclos xeoquímicos e afectando a función dos ecosistemas a escala global, estima esta científica.
Algunhas das ferramentas que teñen as esponxas para loitar contra a decimación da poboación e os cambios na estrutura comunitaria son o recrutamento e a dispersión, que sustentan a súa resistencia ao cambio climático. Daquela, Riesgo Gil, dará conta na súa exposición do labor que desenvolve no seu laboratorio, onde se traballa en patróns de recrutamento de esponxas, combinando enfoques moleculares, morfolóxicos e ecolóxicos para comprender como as esponxas manteñen, conectan e establecen as súas poboacións, e como supervisar os servizos dos ecosistemas como a conectividade da biodiversidade.
Alén doutros contidos, esta especialista en xenómica de invertebrados mariños, presentará no Campus Terra da USC unha metodoloxía novidosa, baseada na capacidade natural da esponxa para alimentarse con filtros, para controlar os patróns de biodiversidade en ecosistemas dominados por esponxas, o que permite unha forma estándar, precisa e democrática de avaliación da biodiversidade que incluso ofrece unha xanela á estrutura comunitaria dos ecosistemas pasados.