A Facultade de Ciencias premiará traballos estudantís con bonos para mercar no comercio local de Lugo
A Facultade de Ciencias do Campus Universitario de Lugo recoñecerá o talento do alumnado participante no concurso “Petiscos de Ciencia” con premios en forma de bonos para consumir no comercio de proximidade.
A iniciativa conta coa colaboración da Asociación de Empresarios Lugo Monumental, que emitiu 600 euros en vales de compra para seren utilizados en calquera dos 165 establecementos adheridos á entidade.
O certame “Petiscos de Ciencia” alcanza este ano a súa quinta edición e está dirixido a alumnado de ESO, formación profesional e bacharelato de institutos de Galicia e tamén de zonas galegofalantes situadas fóra da comunidade autónoma. As pezas poden presentarse de maneira individual ou en grupos de ata tres integrantes e consisten na creación de vídeos en galego, cunha duración de entre 30 e 90 segundos, nos que se divulgue calquera aspecto relacionado coa ciencia.
A programación completarase mañá venres cunha mesa redonda ás 11.00 horas no Salón de Actos da Facultade baixo o título “A carreira investigadora”, organizada con motivo do Día Internacional da Muller e da Nena na Ciencia. No encontro participarán Marta Prado Rodríguez, Patricia Cazón Díaz, Noelia Vigo Díaz e Nerea González Rodríguez.
A continuación, ás 12.00 horas, e en relación coa celebración do Día da Lingua Materna, desenvolverase un monólogo a cargo de Patricia González Cabaleiro, gañadora do concurso Gargallada Científica 2025, así como a intervención narrativa “As cousas non sempre son o que parecen” de Carlos Rebolo. O acto concluirá coa entrega dos premios de “Petiscos de Ciencia” 2025.
Os galardóns distribuiranse en cinco premios de 250, 150, 100, 50 e 50 euros, que se entregarán en vales de 25 euros co obxectivo de facilitar o seu uso. A Facultade decidiu que estas achegas se destinen exclusivamente á adquisición de produtos ou servizos no comercio local lucense, reforzando así o apoio ao tecido empresarial da cidade a través de Lugo Monumental.
Desde a asociación empresarial salientan e agradecen esta aposta polo comercio de proximidade, que supón non só unha inxección económica directa, senón tamén unha mensaxe clara en favor da sustentabilidade do tecido produtivo local e da relevancia dos establecementos tradicionais. Ademais, subliñan que o feito de que as persoas premiadas sexan estudantes contribúe a fomentar hábitos de consumo responsable entre a mocidade, un sector clave para o futuro do comercio urbano.
A entidade tamén quixo expresar o seu recoñecemento á decana da Facultade de Ciencias, Asteria Luzardo Álvarez, á secretaria Patricia Regal López e ao conxunto do profesorado do centro pola súa implicación e polo compromiso demostrado co comercio local.
Para Lugo Monumental, participar nestas actividades supón unha satisfacción e un motivo de orgullo, ao tempo que agradecen á Facultade a súa implicación na promoción do consumo local e na dinamización da vida económica e social da cidade.