A Federación Veciñal Lucus Augusti acollerá unha xornada divulgativa sobre saúde mental
Desde a Federación de Asociacións veciñais “ Lucus Augusti” da provincia de Lugo manifestan o seu apoio rotundo aos fins da Fundación SALMA –Fundación para o Coidado da Saúde Mental en Galicia- e anuncian a próxima celebración dunha xornada divulgativa en formato de mesa redonda, o 17 de marzo de 2022 ás 19.30 horas no seu local social situado na rúa Luís Ameijide, 10.
Devandito encontro contará coa presenza e participación nunha charla-coloquio, da presidenta da Fundación SALMA, Ana Lucía González Novás; así como dun profesional vinculado directamente co ámbito da Enfermería na área de Saúde Mental; e doutro profesional da Medicina, con especialidade nesta materia.
A realización desta xornada xorde por mor da reunión da Xunta Directiva da Confederación Galega de Asociacións Veciñais “Rosalía de Castro” – CoGaVe, celebrada o pasado venres 25 de febreiro na cidade de Lugo, e á que acudiu Ana Lucía González Novás, presidenta da Fundación SALMA, para agradecer o manifesto asinado o pasado mes de outubro de 2021 polas sete Federacións de Asociacións Veciñais integrantes da COGAVE.
Con esta próxima xornada, a Federación de Asociacións Veciñais “ Lucus Augusti” da provincia de Lugo ratifica o seu compromiso con esta causa que afecta directamente á práctica totalidade da poboación na sociedade actual: a Saúde Mental e a súa repercusión.