A Federación veciñal reclama o arranxo "urxente" do Leirapárking
A Federación provincial de Asociacións Veciñais Lucus Augusti de Lugo, tras recibir "múltiples queixas respecto diso", de veciños e veciñas, usuarios do leirapárking do Hospital Universitario Lucus Augusti, reclaman á Concellería de Mobilidade e Infraestruturas do Concello de Lugo unha solución ao "lamentable estado actual".
"A situación actual do leirapárking é desastrosa no que se refire a pavimento; o cal, durante os pasados días de choiva vividos na nosa cidade, motivou a formación de charcos, coas consecuentes consecuencias directas en danos a vehículos e, por suposto, a persoas", explicaron.
A este respecto, desde a entidade, lembran a contestación da concellería sobre a imposibilidade de proceder ao asfaltado do leirapárking, "por corresponder a un 5% non aprobado do Plan Xeral de Ordenación Municipal".
Por isto, matizan que, na actualidade, xa se atopa aprobado ese 5% pendente do PXOM de Lugo, polo que "se pode proceder xa aos labores de asfaltado do leirapárking necesarias -e imprescindibles-, e que, desde a nosa entidade, solicitamos que sexa, ademais, con carácter urxente, dado o lamentable estado actual".
Noutra orde de cousas, desde a Federación provincial de Asociacións Veciñais Lucus Augusti de Lugo, solicita coñecer, tamén, os detalles relacionados coa empresa encargada do mantemento do leirapárking: cales son as súas obrigacións, o seu custo, a súa periodicidade etc.