A Fundación Margarita Ledo pecha o programa de verán cunha homenaxe a Castelao
A Fundación Margarita Ledo Andión pecha este venres, 29 de agosto, o seu programa de verán en Castro de Rei cunha xornada dedicada á memoria de Castelao, unha figura central da historia cultural e política galega. A actividade, que conta coa colaboración do Museo de Viladonga e o apoio da área de Cultura da Deputación de Lugo, chega tras dous meses de programación nos que houbo cine, música, instalacións artísticas e conferencias que encheron de contido os seráns estivais.
A Casa da Galería acollerá a inauguración da mostra Castelao, tinta invisíbel, que reúne materiais orixinais dos anos republicanos, como exemplares do Galicia Mártir, e percorre a biografía do rianxeiro a través da mirada do Cego Zago e de Isaac Díaz Pardo. A exposición conecta, ademais, co traballo plástico do artista alemán Markus Döhne, que propón un diálogo entre a xeración do exilio e a actualidade.
No mesmo acto, o cineasta Xan Leira (Bos Aires, 1955), cunha traxectoria de máis de 50 documentais centrados na memoria, a república e o exilio galeguista en Arxentina, presentará a súa obra O Consello de Galiza. O filme recupera a traxectoria desta institución creada en 1944 en Montevideo como goberno galego no exilio e integrada por Castelao, Suárez Picallo, Alonso Ríos e Elpídio Villaverde. A través de testemuños de galeguistas e republicanos, así como de análises de estudosos e políticos contemporáneos, a peza afonda no papel do Consello como garante da vixencia xurídica e política do Estatuto de Autonomía aprobado en 1936.
O texto de presentación da Fundación lembra o Castelao político, deputado do Partido Galeguista que viaxou á URSS, Cuba ou Nova York na procura de apoios para o goberno lexítimo da II República. Un creador poliédrico que escribiu en prensa, denunciou o caciquismo no Álbum Nós, deseñou carteis e viñetas e deixou unha pegada comunicativa recoñecíbel e inimitábel. “Unha sinatura que se prendeu ao noso devalo ao longo do século”, salientan desde a entidade organizadora, reivindicando unha “longa e eterna vida” para a memoria de Castelao.