A Librería Trama acolle un taller de xogos de mesa con Brazolinda
A Librería Trama acolle un taller de xogos de mesa con Brazolinda este sábado, 23 de novembro, ás 11.30 horas.
Esta actividade, aberta á participación das persoas interesadas, consistirá nun taller de xogos cooperativos pensados para que poidan xogar xuntos grandes e pequenos con Brazolinda, un proxecto de deseño e fabricación de xogos de mesa en galego.
Así, explican que os xogos de Brazolinda, “todos de creación propia, están pensados para que poidan xogar xuntos grandes e pequenos. O xogo en grupo e/ou en familia é unha actividade moi enriquecedora tanto dende o punto de vista da aprendizaxe de actitudes, dinámicas, habilidades motrices e mentais, como para axudar a unir lazos. O xogo de mesa é un terreo neutral no que non caben discriminacións en función do xénero, da procedencia, das capacidades físicas ou mentais. Por iso, é unha ferramenta tan interesante á hora de educar, tanto na escola como na casa; potenciando ademais a concentración, o razoamento, a cooperación, a aprendizaxe de vocabulario e comportamentos”.