A Liga Galega de Karate que se celebra en Lugo reunirá 639 deportistas
A primeira xornada da Liga Galega de Karate foi presentada no Pazo dos Deportes polo vicepresidente da Deputación de Lugo, Efrén Castro, e pola deputada de Cultura, Iria Castro, quen animaron á cidadanía a asistir a un evento con acceso gratuíto e celebraron que a provincia volva converterse en sede dun encontro deportivo desta magnitud. Ambos destacaron que acoller esta cita no Pazo permite que os deportistas e clubs lucenses poidan competir preto da casa, facilitando a participación e o acompañamento das familias.
A competición reunirá un total de 639 deportistas, desde categoría prebenxamín ata júnior, pertencentes a 33 clubs de toda Galicia. A Liga estrutúrase en dous niveis: iniciación, reservado para aqueles karatecas que están a dar os seus primeiros pasos e non acadaron medallas en probas oficiais durante esta tempada, e avanzado, aberto a todos os participantes pero de obrigatorio acceso para os que xa subiron ao podio nalgunha competición oficial.
A presenza lucense estará representada por catro entidades: o Club de Karate de Chantada, a Escola Dajankai de Lugo, a Escola Deportiva Shihan e o Full Karate Club Galaico, que suman entre todas un total de 150 competidores.
A xornada desenvolverase en sesións de mañá e tarde distribuídas en seis tatamis, un dispositivo que supón un importante reto organizativo para a Federación Galega de Karate. O presidente da entidade, Óscar Lafuente, agradeceu durante a presentación a colaboración institucional e a cesión das instalacións do Pazo, subliñando que o apoio recibido é clave para levar a cabo unha cita deportiva deste tamaño.