A Milagrosa acollerá un torneo de xadrez con portas abertas para fomentar este deporte
A Asociación das Festas do Barrio da Milagrosa, en colaboración coa Escola Luguesa de Xadrez, a Concellería de Deportes de Lugo, a Deputación Provincial e Deporte Galego, organiza o Torneo de Xadrez Festa da Milagrosa, que terá lugar o vindeiro 6 de setembro ás 18.00 horas na rúa Mallorca.
O torneo, de carácter gratuíto, disputarase a un ritmo de cinco minutos máis tres segundos por xogada, baixo o sistema suízo a seis roldas, o que garante que ningún participante quede eliminado e todos poidan xogar a totalidade das partidas.
Trátase dunha competición absoluta, aínda que se entregarán premios aos mellores clasificados nas categorías Sub 8, Sub 10, Sub 12, Sub 14 e Sub 16, ademais dos cinco primeiros da categoría Absoluta.
A inscrición tamén será gratuíta e poderá realizarse a través da ligazón habilitada, respectando o límite de prazas establecido por orde de rexistro.
En paralelo, durante o transcurso do torneo, a Escola Luguesa de Xadrez desenvolverá unhas xornadas de portas abertas nas que o público poderá xogar partidas libres, iniciarse no xogo da man dos monitores e reservar praza para a actividade deportiva.