A mostra fotográfica 'A porta fechada' de Ana Gil Rodríguez atópase no Museo Provincial de Lugo
O Museo Provincial de Lugo acolle a mostra fotográfica 'A porta fechada' de Ana Gil Rodríguez (Ourense, 1973), que representa o fogar como espazo de submisión e desasosego, ata o vindeiro 15 de xuño.
A mostra, que poderá visitarse no Refectorio do Museo, recolle o froito dun traballo de investigación sobre o espazo doméstico que a artista desenvolve desde 2006 e que reflexiona sobre o fogar como espazo de submisión e desasosego.
A técnica empregada, a impresión fotográfica sobre aluminio brushed dourado, reforza a intencionalidade perturbadora deste proxecto artístico.
A exposición encádrase no programa “(Re)coñecer, (Re)presentar e (Re)distribuir da Rede Museística Provincial, que impulsa a presenza da creación artística e o comisariado feminino nos museos provinciais.
A deputada de Cultura sinalou que “este programa está a converter o Museo Provincial de Lugo nun espazo de referencia para a creación artística feminina galega”, lembrando a sucesión de exposicións de “artistas históricas como María Corredoyra, de artistas consagradas a escultora como Soledad Penalta ou a artísta do vidro Julia Ares, aínda coa exposición aberta no Museo, ou artistas menos habituais nos circuítos expositivos como Ana Gil Rodríguez”.
A responsable provincial valorou “a singularidade da proposta artística de Ana Gil Rodríguez, que conectou coa filosofía doutros proxectos expositivos promovidos pola Rede Museística que procurar representar e recoñecer historias soterradas ou silenciadas”.
O acto de inauguración tivo continuidade co espectáculo 'En busca de aire', unha peza de danza contemporánea a cargo de Carlota Pérez e Mikel Aristegui acompañada da música de Davide Salvado e Cibrán Seixo en directo.