A neuropsicóloga Elisa López de Adace Lugo impartirá unha charla nas Xornadas de Saúde Femenina
Esta tarde de xoves, ás 18.30 horas, a Asociación de Dano Cerebral en Lugo (ADACE Lugo) participará nunha nova sesión das Xornadas de Saúde Feminina, unha iniciativa promovida pola Concellería da Muller, Igualdade e Inclusión do Concello de Lugo.
O encontro terá lugar no Centro de Convivencia de Uxío Novoneyra, e abordará o tema 'A muller no Dano Cerebral Adquirido', unha perspectiva específica sobre como afecta esta condición ás mulleres e que necesidades particulares presentan. A sesión será impartida pola neuropsicóloga Elisa López, especialista nesta área.
As Xornadas de Saúde Feminina, que se celebran desde marzo ata xuño, inclúen diversas actividades dirixidas a promover o benestar integral das mulleres e tratar temáticas relevantes para a súa saúde física, mental e social.
A asistencia é gratuíta, aínda que require inscrición previa a través do correo electrónico igualdade@lugo.gal. A participación está aberta a toda a cidadanía interesada en ampliar os seus coñecementos sobre esta cuestión desde unha perspectiva de xénero e saúde.