A Oficina Municipal de Turismo de Lugo reabre polo Entroido tras resolver unha incidencia sanitaria
O Concello de Lugo informou de que a Oficina Municipal de Turismo situada na Praza do Campo volverá ofrecer atención e información ás persoas que visiten a cidade coincidindo coa celebración do Entroido, unha vez solucionadas as incidencias detectadas nas instalacións.
Segundo explicou a administración local, os problemas rexistrados estiveron relacionados coa entrada puntual de roedores no interior do inmoble. Ante esta situación, activáronse as actuacións técnicas necesarias para asegurar a plena seguridade e salubridade do espazo. En concreto, executáronse medidas específicas de desratización dentro da oficina, reforzouse o illamento físico do edificio e procedeuse á revisión do predio lindeiro por parte dos servizos municipais competentes para identificar e eliminar a posible orixe da incidencia.
Unha vez comprobada a eficacia destas intervencións, o servizo retoma a súa actividade en condicións óptimas e con total normalidade, segundo subliña o Concello.
Desde o Goberno local destacan que a tempada de Entroido representa unha oportunidade idónea para descubrir o patrimonio histórico, cultural e gastronómico da cidade, polo que animan tanto á veciñanza como ás persoas visitantes a achegarse á oficina para obter información actualizada sobre a programación festiva e as diferentes propostas de lecer.