A Piringalla comeza as súas festas coa entrega dos Bastóns de Ouro
O barrio da Piringalla inaugurou as súas festas na honra a San Isidro co pregón a cargo da líder do PP de Lugo e vicepresidenta do Parlamento Elena Candia e a entrega dos Bastóns de Ouro ás persoas distinguidas este ano con este recoñecemento veciñal. A distinción foi para os veciños Antonio Vila e Segundo Vázquez, Zaira Dapena, Flor Rubinos, José Manuel Rozas e para o doutor Botana.
O programa, que comezou cunha verbena da man do Combo Dominicano, continuará ata o vindeiro domingo con animación musical da man de DJs, grupos e orquestras como Cinema ou Gran Parada. No programa tamén destaca unha xuntanza de coches clásicos que se concentrarán na rúa Manuel María o sábado 18 ás 11.00 horas; e o Día do Neno o domingo 19, que contará con atraccións e actividades infantís para os máis pequenos.
Este xoves organizarase o oitavo Campionato do Mundo en Lanzamento de Pantuflas na rúa San Isidro con premios de 30, 20 e 10 euros máis trofeos. Xa pola noite, actuarán a partir das 22.45 horas o dúo Estrellas e a orquestra Cinema. O venres, actuará o grupo de zumba dirixido por Mila e a orquestra Gran Parada e o sábado terá lugar a primeira Xuntanza de Coches Clásicos na rúa Manuel María e verbena con Neón e o solista de Abanico José Manuel.
O programa remata co Día do Neno coa apertura de carruseis ás 12.00 e ás 17.00 horas. Volverá actuar o grupo de zumba e haberá degustación de chocolate con churros para a cativida ás 10.30 horas.