A piscina de Frigsa acolleu 8.000 lucenses no mes de xullo
Máis de 8.000 lucenses escolleron a piscina exterior de Frigsa para refrescarse durante o mes de xullo. A asistencia sitúase en niveis similares aos do ano pasado, no que no mesmo mes experimentouse unha ola de calor e as temperaturas medias foron sensiblemente superiores ás do mesmo período deste ano.
O concelleiro de Deportes, Jorge Bustos, valorou positivamente este dato de asistencia. “A piscina exterior de Frigsa xa está consolidada como zona de recreo na tempada estival e no que levamos de mes de agosto a asistencia segue sendo moi alta”, sinalou o edil. Bustos recordou que “o Goberno local apostou, un ano máis, por conxelar as tarifas co obxectivo de non gravar as economías domésticas e favorecer o acceso ás dotacións, xa que se trata dun recurso moi valorado pola veciñanza desde unha perspectiva lúdica e saudable”.
Esta política de prezos populares, xunto coa mellora dos servizos nas instalacións, repercutiu na consolidación da asistencia nesta área de baño. A piscina exterior de Frigsa foi utilizada no mes de xullo por 8487 veciños e veciñas. Á instalación situada no parque da Milagrosa acudiron 2968 crianzas e 3880 persoas adultas. Ademais, outras 1939 persoas fixeron uso da piscina no contexto dunha dinámica grupal, ben formando parte dalgunha asociación ou como asistentes aos campus organizados neste equipamento.
A pesar de que a Xunta denegara aos lucenses por segundo ano consecutivo a posibilidade de contar cunha zona de baño pública na que gozar de forma cómoda é segura do río, para aqueles que optan por usar o Miño para bañarse, e co obxectivo de que os bañistas conten coas máximas garantías, o Goberno local puxo en funcionamento, unha tempada máis, un servizo de salvamento e socorrismo fluvial que leva a cabo o seu labor de vixilancia a través de todo o leito asistido por unha lancha motorizada.
Deste xeito, a contorna do río Miño, cuxo patrimonio natural está a ser posto en valor e o seu acceso desde o casco urbano mellorado a través de distintas intervencións postas en marcha polo Goberno de Lara Méndez dentro da estratexia Dusi-Muramiñae, sitúase como outro espazo referente para o ocio durante os meses de verán. Non só como zona de recreo, senón tamén como espazo cultural. Así, durante todos os martes do mes de xullo a contorna natural que se corresponde coa zona pública de baño denegada pola Xunta converteuse nun escenario lúdico no que a cultura galaico-portuguesa e o patrimonio paisaxístico da ribeira foron os grandes protagonistas.