A plataforma ‘Por un monte galego con futuro’ convoca concentracións contra a política forestal da Xunta
A plataforma cidadá Por un monte galego con futuro convocou varias concentracións para o xoves 21 de agosto en diferentes puntos da provincia de Lugo co obxectivo de protestar contra a política forestal da Xunta, que consideran responsable da situación dos montes e dos reiterados incendios que afectan tamén ás vivendas.
As mobilizacións desenvolveranse en Lugo, diante do edificio da Xunta ás 20.00 horas, en Monterroso, diante do Concello tamén ás 20.00 horas, e en Vilalba, na praza da Constitución a partir das 20.30 horas.
Baixo o lema “A política forestal do PP queima os nosos montes, queima as nosas casas”, a plataforma chama á cidadanía a mobilizarse para reclamar un cambio de rumbo na xestión forestal e garantir un futuro sostible para o territorio galego.