A representación teatral ‘Un futuro diferente é posible’ sobre a violencia de xénero chega a Baralla
O Centro Sociocultural de Baralla acollerá o sábado 14 de marzo de 2026 a representación teatral Un futuro diferente é posible, unha proposta escénica de carácter reivindicativo centrada na loita contra a violencia de xénero.
A actividade será posta en escena pola Asociación Cultural Zoela de Becerreá e desenvolverase a través dun formato de teatro en voice-over, unha modalidade na que as voces narran e dan vida á historia mentres a escena se constrúe con elementos visuais e interpretativos.
A proposta artística nace a partir do concurso de relatos curtos sobre violencia de xénero convocado pola Fundación Luz Casanova. A partir deses textos elaborouse unha montaxe teatral que pretende sensibilizar á sociedade e promover a reflexión sobre esta problemática social.
Con esta iniciativa, a Asociación Cultural Zoela aposta por empregar o teatro como ferramenta de concienciación e denuncia, achegando ao público historias que abordan a realidade da violencia de xénero e transmiten a idea de que é posible construír un futuro diferente.