A Reserva da Biosfera Río Eo, Oscos e Terras de Burón recupera o Foro de Participación Social tras nove anos
A Reserva da Biosfera Río Eo, Oscos e Terras de Burón abriu unha nova etapa coa reactivación do seu Foro de Participación Social, un órgano esencial de gobernanza que levaba nove anos sen reunirse. O reencontro supón un punto de inflexión na xestión deste espazo protexido e reforza o compromiso das administracións e do propio territorio cun modelo de desenvolvemento sostible que combina a conservación do patrimonio natural co impulso socioeconómico local.
A xuntanza estivo presidida pola directora xeral de Patrimonio Natural da Xunta de Galicia, Marisol Díaz Mouteira, e polo director xeral de Custodia do Territorio e Prevención de Incendios do Principado de Asturias, David Villar. No encontro participaron tamén representantes municipais, grupos de desenvolvemento rural, asociacións do territorio e outros axentes sociais implicados na vida da Reserva.
Durante a sesión púxose sobre a mesa a necesidade de escoitar activamente ao territorio e de situar ás persoas e ás actividades locais no centro das políticas públicas da Reserva. As Reservas da Biosfera caracterízanse por buscar un equilibrio entre a protección da biodiversidade, a xestión responsable dos recursos e o desenvolvemento territorial, un obxectivo que só pode acadarse a través do diálogo continuo e da participación real dos axentes locais.
Desde o propio territorio, e a través da Asociación InterEo, vense desenvolvendo de maneira sostida proxectos de cooperación con universidades, empresas, cooperativas do sector primario e distintas administracións. Moitas destas iniciativas contan con financiamento europeo e, tanto as xa finalizadas como as que están en marcha, contribúen a consolidar a Reserva como un motor de desenvolvemento e cohesión territorial.
No foro tamén se trasladou ás administracións autonómicas a importancia de manter un compromiso firme e continuado coa Reserva da Biosfera, nun nivel comparable ao esforzo que desde hai anos veñen asumindo os concellos e as entidades locais. Neste contexto, a reactivación do Foro de Participación Social considérase un paso imprescindible para recuperar o tempo perdido e avanzar cara a unha xestión máis próxima á realidade diaria do territorio.
A reunión serviu igualmente para abordar o futuro da Reserva, coa vontade de consolidar unha dinámica de traballo estable, reforzar a cooperación entre Galicia e Asturias e avanzar na planificación estratéxica. De cara ao próximo ano, o Principado de Asturias asumirá a presidencia da Reserva, coa previsión de convocar polo menos dúas reunións anuais do Foro.
A posta en marcha de novo dos órganos de participación da Reserva da Biosfera Río Eo, Oscos e Terras de Burón marca así o inicio dunha etapa orientada a fortalecer a gobernanza, mellorar a coordinación institucional e afrontar de maneira conxunta os retos demográficos, ambientais e socioeconómicos dun territorio compartido.