A Sociedade Filarmónica presenta a nova tempada de concertos
Rubén Arroxo, Tenente Alcalde do Concello de Lugo, xunto coa Concelleira de Cultura, Turismo e Promoción da Lingua, Maite Ferreiro e Iria Castro, deputada de Cultura, participaron hoxe na presentación da nova tempada de concertos da Sociedade Filarmónica de Lugo. A nova tempada contará en total con 13 concertos que se celebrarán no Círculo das Artes entre o vindeiro 20 de outubro e o 15 de maio de 2024.
Maite Ferreiro lembrou que “desde a área de Cultura continuamos coa nosa aposta firme pola realización de actividades culturais de calidade demostrada a nivel galego, estatal e internacional” e engadiu “o compromiso da sociedade Filarmónica por manter esta actividade xa consolidada no calendario cultural de Lugo”.
A programación desta tempada conta con 13 concertos, achegando a Lugo a músicos destacados a nivel galego, estatal e internacional. Desde a Sociedade Filarmónica de Lugo cóntase coas tres agrupacións máis importantes de Galiza, con concertos da Real Filharmonía de Galiza, a Orquestra Sinfónica de Galiza, considerada a máis importante do estado en canto a calidade, ou a Orquestra Sinfónica Vigo 430.
Todos os concertos do ciclo terán lugar no Círculo das Artes de Lugo ás 20:00 h. A programación completa pode consultarse na web da Sociedade Filharmónica de Lugo.
O PROGRAMA
O venres, 20 de outubro, a Sociedade Filarmónica de Lugo dará comezo á que será a súa tempada de concertos número 77; tempadas que veñen sucedendo de forma ininterrumpida dende o ano 1947, alcanzando xa máis de 720 concertos cos máis recoñecidos músicos e agrupacións de todo o mundo. Trece concertos programados de outubro a maio con orquestras, solistas e agrupacións de cámara de primeira fila que traerán á nosa cidade a mellor música.
Ábrese a tempada con dous concertos que ofrecerán, case de forma consecutiva, as dúas grandes orquestras da nosa Comunidade. A Real Filharmonía de Galicia actuará no Círculo das Artes o venres 20 de outubro, dirixida pola portuguesa Joana Carneiro, e una semana máis tarde, o 27 de outubro, será a Orquestra Sinfónica de Galicia a que interpretará os dous concertos para piano de Frederic Chopin, xunto co pianista e director canario Iván Martín, no mesmo escenario.
Destaca tamén a presenza na tempada da terceira gran orquestra sinfónica galega: a Orquestra Vigo 430, con dúas datas (16 de decembro e 23 de marzo). Destacar que na primeira delas Isabel Rubio dirixira a Sinfonia do Novo Mundo de Dvorak. a Real Filharmonía de Galicia será a encargada de pechar o ciclo de concertos o 15 de maio, dirixida neste caso polo violinista e director italiano Enrico Onofri.
Tamén solistas de gran prestixio internacional intervendrán na tempada, tanto con orquestras como en recitáis: a violinista francesa Sophie de Bardonnèche, o pianista Iván Martin, o percusionista Conrado Moya, o frautista André Cebrían e a violonchelista galega Alejandra Díaz serán algúns deles.
O piano será o protagonista nun recital (20 de xaneiro) a cargo do Geister Dúo, o dúo frances de referencia na interpretación do piano a 4 mans e gañador dos máis importantes Concursos Internacionais de piano a 4 mans, os de Mónaco e Munich.
Terá tamén presencia a música de cámara en tres datas moi especiais: o 22 de novembro Concerto 1700, grupo referente na interpretación historicista, con un programa con tríos de corda da Ilustración; o 27 de febreiro o Zoar Ensemble, con un arranxo propio para quinteto de vento da Suite Iberia de Albéniz e o 10 de abril o Cosmos Quartet, un dos cuartetos de corda máis significado dos últimos anos que interpretará obras de Webern, Bartok e Brahms.
Un lugar sinalado terá na tempada unha nova sección denominada Filharmonica Km. 0, na que terán cabida novos valores da música lucense, comezando o 9 de marzo cun concerto a cargo do Gañador do Concurso de Solistas do Conservartorio Prof. de Música Xoán Montes de Lugo xunto a un quinteto formado por músicos lucenses de ampla traxectoria, e un segundo concerto presentará á Banda Filharmónica de Lugo con dúas solistas lucenses.
A Banda Filharmónica de Lugo tamén celebrará o seu décimo aniversario con un concerto programado para o 2 de decembro.
Todos os concertos do ciclo serán no Círculo das Artes de Lugo ás 20:00 h.
As persoas interesadas en adquirir o abono de tempada ou facerse socias da Sociedad Filarmónica pódeno facer escribindo ao correo electrónico filarmonicadelugo@gmail.com. As entradas para non socios, para os concertos soltos, poderanse adquirir o mesmo día da actuación nas oficinas do Círculo das Artes. Tamén haberá entradas para estudantes a prezo moi reducido e entrada de balde para menores de idade e estudantes do Conservatorio.
