A subdelegada recibe aos veciños de Recimil e Coeu para falar dos pasos a nivel
A subdelegada do Goberno en Lugo, Isabel Rodríguez, mantivo este luns un encontro con representantes das Asociacións de Veciños de Recimil e Coeu, que lle expuxeron as principais demandas en materia de seguridade do paso a nivel situado en Lugo.
A subdelegada, que se comprometeu a trasladar as súas peticións ao Adif, confirmoulles que está previsto iniciar o proceso de licitación do proxecto para a supresión do paso a nivel de Recimil.
Neste senso, Isabel Rodríguez reafirmou a prioridade do Goberno en materia de seguridade que se exemplifica en que só na provincia de Lugo o Ministerio de Transportes, Mobilidade e Axenda Urbana ten en marcha os proxectos para eliminar 34 pasos a nivel da rede ferroviaria ao seu paso polos municipios de Lugo, Monforte de Lemos, Sarria e Rábade, co consecuente aumento da seguridade ferroviaria, viaria e peonil destas zonas.