A Uned de Lugo abre o prazo para as IV Xornadas Aprendendo Feminismo
A Uned de Lugo pon en marcha as IV Xornadas Aprendendo Feminismo: Despatriarcalizando a Sociedade, que se centrarán nos efectos negativos do patriarcado sobre a educación e a sociedade, entendendo de tal forma que persiste unha visión androcéntrica da vida instalada socialmente e educativamente, que trae consecuencias violentas que truncan os anhelos, as relacións, e até a vida de moitas mulleres. Realizarase de maneira online ou presencial do 2 ao 3 de abril.
Esta edición proponse achegar á sociedade a outras miradas, para ir construíndo a igualdade de dereitos reais, promovendo a concienciación e divulgación dos retos actuais da axenda feminista, instrumentos formais e informais para combater a desigualdade. Así mesmo, neste encontro abordaranse os desafíos actuais na axenda feminista, destacando o ODS número 5 da Axenda 2030, que busca garantir a participación plena e efectiva das mulleres, así como a igualdade de oportunidades en todos os niveis da vida.
Participarán nelas destacadas relatoras como Mar Carballo Cela, profesora de Filosofía de Secundaria en IES Lucus Augusti de Lugo; Concepción García Vázquez, técnica superior en Transporte e Loxística, promotora e presidenta da PFRG -Plataforma do Feminismo Radical de Galicia desde a súa formación até principios de 2024 ou Felisa Redondo Valín, profesora de Lingua Castelá e Literatura e de Igualdade de Xénero en IES Ánxel Fole de Lugo, coordinadora de Igualdade de Xénero no centro.
Tamén formarán parte da iniciativa Mercedes Oliveira Malvar, catedrática de Filosofía e doutora en Educación Afectivo Sexual, profesora en diferentes másteres de xénero, presidenta da ONG Federación de Planificación Familiar de España; Priscila Retamozo, politóloga, formadora e consultora experta en igualdade de xénero; Carmen Abuín González, licenciada en Xornalismo e en Publicidade e Relacións Públicas (pola UPSA) e docente en Igualdade; así como mulleres do colectivo Comadres das Letras.