A UNED de Lugo impulsa un curso pioneiro sobre o acceso á xustiza das persoas con discapacidade intelectual
A UNED de Lugo, en colaboración con FADEMGA Plena Inclusión Galicia e a Asociación Xustiza e Diversidade, organiza o curso “O acceso á xustiza das persoas con discapacidade intelectual ou do desenvolvemento”, unha formación pioneira que se celebrará entre os días 5 e 15 de maio de 2025, e que poderá seguirse tanto de forma presencial como en liña, en directo ou en diferido. A actividade está en trámite de recoñecemento dun crédito ECTS como actividade de extensión universitaria.
O obxectivo deste curso é ofrecer ferramentas prácticas e coñecementos especializados que permitan garantir un acceso real e en igualdade de condicións ao sistema xudicial para as persoas con discapacidade intelectual, aliñándose cos principios de igualdade, accesibilidade e xustiza inclusiva.
A formación está dirixida por Sonia Calaza López, catedrática de Dereito Procesual da UNED, no marco da rede de investigación “Alianzas estratéxicas da Xustiza: Educación, Igualdade e Inclusividade”, financiada polo Ministerio de Ciencia, Innovación e Universidades.
O curso contará coa participación de profesionais de ampla traxectoria nos ámbitos xurídico, social e penitenciario, como Santiago Cruces, fiscal delegado de apoio á persoa con discapacidade en Galicia; Pablo Muñoz Vázquez, xuíz de familia nos xulgados de Lugo; Elvira Fernández Domínguez, subdirectora de tratamento do Centro Penitenciario de Monterroso; Pilar García-Puertas Taboada, presidenta da Asociación Xustiza e Diversidade; Manuel Seoane Mera, responsable do Programa de Acceso á Xustiza de FADEMGA; Shaila Varela Romero, facilitadora xudicial e experta en accesibilidade cognitiva; e a avogada Mª José Fernández Matías, especialista en familia e discapacidade. Ademais, intervirán tamén Mª Luz Piñón Fontao, Pilar Bernárdez Pastoriza e Mª Dolores Castromán Souto, que achegarán a súa experiencia persoal como expertas por vivencia no acceso á xustiza.
Un dos aspectos máis novidosos da actividade será precisamente a participación directa de persoas usuarias do servizo de facilitación xudicial, que compartirán a súa vivencia en primeira persoa, poñendo en valor esta figura clave para garantir que todas as persoas poidan comprender e ser comprendidas no ámbito xudicial.
Ao longo do curso trataranse cuestións como a accesibilidade cognitiva, os axustes de procedemento recoñecidos polas Nacións Unidas, a intervención do facilitador xudicial, a situación das persoas con discapacidade en contornos penitenciarios, así como os apoios necesarios para facer efectivo o dereito á xustiza.
Esta iniciativa reflicte o compromiso sostido da UNED de Lugo coa xustiza social, a igualdade de oportunidades e os valores dos Obxectivos de Desenvolvemento Sostible, contribuíndo á construción dunha sociedade máis xusta, inclusiva e respectuosa coa diversidade.