A UNED de Lugo inaugura o V Congreso da Muller Rural centrado na igualdade e a sustentabilidade
A UNED en Lugo inaugurou o V Congreso da Muller Rural baixo o título “A familia rural, o poderoso gardián da natureza”, un encontro que ao longo de toda a xornada reúne a expertas, investigadoras e líderes comunitarias para abordar o papel das mulleres na sustentabilidade, o emprendemento e a transición cara a unha economía rural máis verde.
No acto de inauguración, organizado por Tu Repueblas, a Asociación Española Multisectorial de Microempresas (AEMME), a Embaixada do Reino dos Países Baixos en España e a UNED de Lugo, tamén participaron o alcalde de Lugo e deputado provincial, Miguel Fernández Méndez, o conselleiro de Agricultura dos Países Baixos en España, Machiel Kommers, e a directora da Uned de Lugo, Ana Belén Traseira, entre outras autoridades.
Marisol Morandeira destacou que “a igualdade no rural non é un discurso, é unha necesidade urxente. Non haberá futuro para os nosos pobos se as mulleres seguen atopándose con máis barreiras que oportunidades; se falta acceso a servizos; se o coidado continúa recaendo sobre nós, ou se os proxectos de vida dependen de sacrificios que non se lles esixen aos homes”. Engadiu que “non basta con admirar a fortaleza das mulleres rurais. Hai que transformar esa admiración en dereitos e recursos. O rural non necesita aplausos, necesita decisións, orzamentos e prioridades claras”.
A deputada subliñou tamén que “o rural non pode ser o territorio onde todo chega máis tarde: nin os servizos, nin a dixitalización, nin as oportunidades e moito menos a igualdade. Non aceptamos unha Galicia a dúas velocidades”. Neste sentido, resaltou que desde a Deputación traballan para reforzar servizos públicos, impulsar o emprendemento feminino, mellorar a conciliación e recoñecer o valor económico e social do traballo das mulleres rurais: “Non falamos de intencións, falamos de feitos”.