A UNED de Lugo recibe un recoñecemento estatal polo seu proxecto de innovación comunicativa
A UNED de Lugo vén de ser distinguida co Galardón Nacional de Boas Prácticas Universitarias, concedido polo Consello Social da UNED, pola iniciativa “A Comunicación: unha nova ponte cara a Lugo”, un proxecto que permitiu modernizar e transformar en profundidade a estratexia comunicativa do centro.
A proposta, dirixida polo Brand Manager da UNED de Lugo, Carlos García, representou un salto significativo na maneira de conectar tanto coa comunidade universitaria como coa cidadanía en xeral. Baixo a súa coordinación consolidouse un modelo comunicativo innovador, baseado na diversidade de formatos e na vocación de reforzar a identidade institucional.
Entre os avances máis salientables figura a campaña de matriculación “A Universidade Que UNE”, convertida nunha referencia que pon en valor o papel da educación pública e de calidade, así como a transmisión de cultura e principios entre xeracións.
O labor tamén incluíu a coordinación de doce canles de comunicación, o incremento da comunidade dixital ata alcanzar os 20.000 seguidores nas redes sociais e a produción anual de 80 pezas audiovisuais que contribuíron a reforzar a presenza pública do centro. Xunto a isto, desenvolveuse un videopodcast institucional que superou as 80.000 reproducións na súa primeira tempada, consolidándose como un formato divulgativo propio e de amplo alcance.
Este esforzo estratéxico tivo un reflexo directo na evolución do centro, que experimentou un aumento do 10% nas matriculacións, indicador dunha comunicación máis próxima, accesible e eficaz.
A directora da UNED de Lugo, Ana Traseira, expresou a súa satisfacción por este novo recoñecemento e puxo en valor a coherencia do proxecto, a súa contribución ao fortalecemento da identidade institucional e o seu papel para achegar o ensino superior ao conxunto da provincia de Lugo. O galardón destaca tamén o peso do liderado profesional na consolidación dunha comunicación universitaria de referencia.