A veciñanza de Tirimol e Pías agradece a paralización do proxecto Lugaz

Os veciños destacan a disposición de Carmen Lence a escoitar as súas preocupacións e insisten en que o rexeitamento é ao proxecto, non á actividade económica

A veciñanza de Tirimol e Pías, próxima á zona de construción do proxecto Lugaz, expresou o seu agradecemento a Carmen Lence pola decisión anunciada de paralizar o proxecto e pola súa disposición a atender as preocupacións cidadás. Os residentes confían nas súas palabras e agardan que non se vexan defraudados.

Segundo indican, a oposición non vai dirixida ás empresas veciñas nin á actividade económica en xeral, senón a este proxecto en particular polos posibles impactos negativos sobre o medio ambiente, a saúde e a calidade de vida das persoas que habitan na zona.

A veciñanza subliña o seu apoio a iniciativas empresariais que fomenten o crecemento de Lugo, a innovación responsable e as inversións que teñan un efecto positivo na sociedade.

As xornadas informativas organizadas polos propios residentes continuarán abertas a calquera persoa interesada en participar, propoñer ideas ou informarse sobre o proxecto. Ademais, reiteran que este movemento non ten vinculación política: “Aquí hai veciños e veciñas de todas as cores, unidos na defensa do noso territorio e da vida no rural”, explican.