A VI edición de Nada e Corre Lugo 2025 reunirá a preto de 150 mozos deportistas no complexo das Pedreiras
A presentación da sexta edición da competición Nada e Corre Lugo 2025 marcou o inicio dunha cita deportiva que volverá situar o Complexo Deportivo As Pedreiras como epicentro do triatlón de base. O encontro está promovido polo Club Triatlón Cidade de Lugo Fluvial e pola Federación Galega de Triatlón e Pentatlón Moderno, contando ademais co apoio do Concello de Lugo, da Deputación e da Secretaría Xeral para o Deporte.
A proba combinará un segmento de natación na piscina co percorrido de carreira a pé nas pistas de atletismo, adaptando as distancias ás categorías prebenxamín, benxamín, alevín, infantil, cadete e tamén á modalidade inclusiva, o que permitirá unha ampla participación de deportistas novos.
Está previsto que se reúnan case 150 competidores procedentes de Lugo, Vilalba, Ferrol, Narón e Cedeira nunha xornada que servirá como clasificatoria para a Final Galega de Ribeira, que terá lugar o vindeiro 14 de decembro. O Cidade de Lugo Fluvial, entidade organizadora, achegará arredor de medio cento de representantes, converténdose no club con maior presenza e amosando o intenso labor formativo que se desenvolve na cidade co deporte de base.