A VI Lugo en Marcha Contra o Cancro terá dúas modalidades de carreira para adultos e unha infantil
Lugo acollerá o sábado 12 de abril a iniciativa Lugo en Marcha Contra o Cancro, organizada pola Asociación Española Contra o Cancro en Lugo co apoio da Vicepresidencia da Deputación de Lugo, o Concello de Lugo e Xunta de Galicia, entre outras entidades.
A actividade, que terá lugar na Praza da Horta do Seminario, será un evento lúdico-deportivo que busca concienciar á cidadanía sobre a importancia dun estilo de vida saudable na prevención do cancro, fomentando a actividade física e unha alimentación adecuada.
O programa incluirá dúas modalidades de participación: a Andaina, que dará comezo ás 18.00 horas e recorrerá o adarve da Muralla, aberta a todas as idades, e a Carreira 5 km para adultos, que terá lugar ás 19.00 horas. Ademais, os máis pequenos tamén poderán participar nas Carreiras Infantís, que se celebrarán a partir das 19:00 horas. Tanto a saída como a chegada de todas as probas serán na Praza da Horta do Seminario.
As inscricións para participar na carreira e andaina xa están abertas, podendo facerse tanto online a través da web lugocontraocancro.es como de forma presencial na sede da Asociación, situada no Carril dos Loureiros 17, 27002. A recollida de dorsais e camisetas terá lugar o venres 11 de abril de 16.00 a 19.30 horas, e o sábado 12 de abril de 11.00 a 13.30 horas na sede da Asociación. Tamén se poderá recoller dorsal o sábado pola tarde, a partir das 15:00 horas na Praza da Horta do Seminario.
Os prezos de inscrición varían segundo a categoría: a Carreira Infantil custará 5 euros, a Carreira 5 km para adultos, 10 euros, e a Andaina terá un custo de 5 euros para menores e 10 euros para adultos. Para aqueles que desexen colaborar pero non poidan participar, existe a opción de adquirir un dorsal cero, unha inscrición solidaria coa doazón que se elixa.
Todo o recadado destinarase a mellorar a vida das persoas con cancro e das súas familias, ademais de promover a investigación oncolóxica co obxectivo de lograr un 70% de supervivencia para o ano 2030.