A VI ruta motera Pata de Xato percorrerá a montaña lucense combinando turismo e gastronomía
A VI edición da ruta motera Pata de Xato de Lóstregos Lvcvs Motoclub celebrarase o sábado 11 de abril cunha proposta que une mototurismo, gastronomía tradicional e promoción do territorio da montaña lucense.
A actividade consistirá nun percorrido de entre 150 e 160 quilómetros, con saída desde a cidade de Lugo e chegada ao restaurante “O Piñeiral”, no concello da Fonsagrada, onde os participantes poderán degustar a tradicional pata de xato, asada lentamente durante toda a noite en forno de leña, un dos grandes reclamos da xornada.
A edición deste ano contará ademais cun atractivo engadido, xa que Fran Lorenzo, impulsor do proxecto #galicianomada, aproveitará a ruta para gravar un capítulo que será emitido no canal motoadvchannel, especializado no mundo do motor e presente en diferentes plataformas. O obxectivo desta peza audiovisual é dar visibilidade á montaña lucense como destino de mototurismo, poñendo especial atención na comarca da Fonsagrada e no seu patrimonio natural e cultural.
Durante o percorrido, as persoas participantes terán a oportunidade de descubrir algúns dos enclaves máis singulares do norte de Lugo e do occidente asturiano, como a igrexa de Os Vaos, o Pedregal de Irimia, coñecido como o nacemento do río Miño, o Museo dos Muíños de Mazonovo en Taramundi ou o miradoiro do porto da Garganta. A organización ofrece a posibilidade de realizar a ruta de forma guiada por membros do motoclub ou ben en grupos independentes, seguindo o trazado facilitado a través de Google Maps.
A xornada comezará ás 09:30 horas cun almorzo nas cafeterías das Gándaras. Ás 10:00 horas está prevista a saída da ruta longa, duns 150 quilómetros e unha duración aproximada de 2 horas e 50 minutos, mentres que ás 10:30 horas partirá a ruta curta, de 120 quilómetros e arredor de 2 horas. O programa continuará cunha visita a Os Vaos ás 11:00 horas e co avance cara ao Pedregal de Irimia ás 11:30 horas.
Xa ao mediodía, ás 12:30 horas, os participantes chegarán a Mazonovo, en Taramundi, onde se realizará unha visita, seguida dunha pausa para refresco ás 13:00 horas. A ruta retomarase ás 13:30 horas cunha parada prevista no miradoiro do porto da Garganta ás 14:00 horas. A chegada ao restaurante O Piñeiral está programada para as 14:30 horas, onde ás 15:00 horas terá lugar o xantar. A despedida da xornada será arredor das 17:00 horas.