A XIII Ruta 4x4 enche Sarria e consolida a comarca como referente do motor
A XIII Ruta 4x4 da Comarca de Sarria, organizada polo colectivo Os Carro x Catro, converteu a vila nun punto neurálxico do motor ao longo desta fin de semana, reunindo a 750 participantes e superando os 500 vehículos inscritos, unha cifra que confirma o crecemento e a proxección deste evento.
A elevada afluencia deixou un notable impacto económico no municipio, con hoteis, establecementos hostaleiros e servizos locais funcionando ao máximo, reforzando así o dinamismo turístico da zona e contribuíndo ao seu desenvolvemento.
Desde o Concello de Sarria valorouse moi positivamente a organización e o éxito da cita. O concelleiro de Deportes, Félix Seijas, salientou o traballo e a dedicación do colectivo Os Carro x Catro, destacando que o esforzo realizado permitiu alcanzar rexistros históricos e colocar novamente a Sarria como exemplo de organización, seguridade e capacidade para acoller eventos deportivos de gran dimensión.
O edil puxo tamén en valor o papel do voluntariado, da veciñanza e de todas as persoas que se achegaron á vila para vivir unha fin de semana intensa e inesquecible, subliñando que a suma de esforzos permitiu transformar esta proposta deportiva nun auténtico motor social e económico para o municipio.
A implicación do colectivo organizador foi considerada clave para o éxito da ruta, reforzando o prestixio de Sarria dentro do mundo do 4×4 e consolidando á comarca como un territorio capaz de atraer iniciativas de primeiro nivel.