A Xunta avanza no plan de reestruturación parcelaria de Guilfrei, en Becerreá
A Xunta de Galicia continúa avanzando nos traballos de elaboración das bases e do plan de ordenación dos predios con especial vocación agraria na zona de reestruturación parcelaria de Guilfrei, en Becerreá.
Con este obxectivo, o delegado territorial da Xunta en Lugo, Javier Arias, acompañado pola directora territorial da Consellería do Medio Rural, Olga Iglesias, e persoal técnico do departamento, reuniuse hoxe coa veciñanza e cos representantes municipais para explicarlles a proposta do plan e os primeiros trazos da futura rede de camiños, que contará cunha lonxitude aproximada de 20 quilómetros.
Durante o encontro, Arias destacou que o propósito principal é dar a coñecer as liñas xerais do proxecto, recoller as suxestións da veciñanza e valorar a súa posible incorporación ao documento final, que posteriormente será sometido a exposición pública para garantir a participación de todos os implicados.
A actuación conta cun investimento estimado de 1,3 millóns de euros e abrangue unha superficie total de 447 hectáreas, distribuída en 1.719 parcelas pertencentes a 111 propietarios. A Xunta subliña que este proceso permitirá mellorar a ordenación e o rendemento das explotacións agrarias da zona, ao tempo que facilitará o acceso e a mobilidade mediante a nova rede viaria planificada.