A Xunta confirma que o novo centro de saúde do Sagrado Corazón estará na parcela do antigo colexio
O delegado territorial da Xunta, Javier Arias, mantivo este xoves unha reunión cos representantes da Asociación de Veciños do Sagrado Corazón, presidida por Alfonso Ibias, para informarlles sobre o proxecto do novo centro de saúde do barrio.
A xuntanza chega tras anos de espera e coincidiu coa recente confirmación do compromiso do Concello de Lugo para ceder a parcela na que se levantará a nova infraestrutura sanitaria, o que permitirá iniciar un investimento que superará os 4,8 millóns de euros.
Arias confirmou que o futuro centro médico se construirá nos terreos do antigo colexio, unha ubicación que contou desde o principio co respaldo da Xunta e do propio tecido veciñal. “Está no corazón do barrio e é un espazo axeitado que contribuirá á súa rexeneración”, destacou o delegado, quen tamén puxo en valor que a parcela permita proxectos futuros pola súa dimensión.
O seguinte paso será que o Concello se faga coa titularidade da parcela e formalice a súa cesión á Xunta. Arias subliñou que o Goberno galego está disposto a asumir a titularidade completa da finca e que xa se avanzou na análise técnica do terreo, sinalando a zona da pista deportiva como a máis adecuada para a construción. Xunta e Concello deberán agora calcular os custos dos accesos e da urbanización, incluídas as demolicións necesarias, cun custo estimado de 1,8 millóns de euros.
O delegado reiterou o compromiso do Executivo galego coa veciñanza e co persoal sanitario que traballa no Sagrado Corazón, e asegurou que a intención é avanzar con axilidade para que o novo ambulatorio sexa unha realidade canto antes.
O novo centro de saúde, cun investimento específico de 3 millóns de euros, contará con 7 consultas de medicina xeral e outras 7 de enfermaría, así como unha consulta de pediatría e outra de enfermaría pediátrica, ademais de sala de mostras e espazos destinados á docencia. Unha vez operativo, atenderá a arredor de 10.000 persoas, tras a reorganización das cotas dos centros de San Roque e Illas Canarias.