A Xunta dá luz verde ao Plan Parcial dun sector urbanizable en Castro Ribeiras de Lea
A Xunta de Galicia acaba de dar luz verde ambiental ao plan parcial do sector de solo urbanizable SUB/D-2, en Castro de Ribeiras de Lea, no Concello de Castro de Rei, onde se prevé un desenvolvemento residencial de vivendas unifamiliares e agrupadas.
O informe ambiental estratéxico emitido pola Consellería de Medio Ambiente e Cambio Climático, que sae publicado hoxe no Diario Oficial de Galicia, establece que non son previsibles efectos adversos significativos derivados do proxecto sempre que se cumpra cos condicionantes incluídos no documento co fin de garantir o mellor servizo de abastecemento e saneamento así como favorecer unha axeitada integración paisaxística do proxecto.
Neste sentido, o informe foi elaborado no marco do procedemento de avaliación ambiental estratéxica simplificada desta iniciativa, un trámite no que a documentación presentada polo promotor foi sometida a consulta dos organismos públicos interesados e tanto o borrador como o documento ambiental estratéxico estiveron publicados no portal web da Consellería para que o público en xeral puidese consultalos e facer as observacións ou suxestións que considerase oportunas.
Unha vez emitido o informe ambiental estratéxico, remítese ao promotor -León XIII de Lugo, SCG- e ao órgano substantivo -Concello de Castro de Rei- xunto cos informes recibidos na fase de consultas previas e faise público mediante publicación tanto no DOG como na páxina web da Consellería de Medio Ambiente e Cambio Climático.
O ámbito de actuación é un espazo de máis de 11,2 hectáreas de extensión situado no extremo noroeste da vila de Castro de Ribeiras de Lea, que está rodeado por espazos dotacionais de diversa natureza, como pistas deportivas, residencia de maiores e centros educativos, entre outras. A maiores, no bordo oeste limita cunha zona húmida formada por charcas rodeadas por unha masa de bosque húmido.
O proxecto prevé un desenvolvemento residencial articulado en sete ámbitos de vivenda unifamiliar illada ou pareada na zona central, un ámbito de vivenda unifamiliar acaroada no oeste e catro ámbitos de vivenda agrupada no bordo leste. A altura máxima da edificación será de baixo e un piso para a vivenda unifamiliar e baixo e dous pisos para a agrupada.