A Xunta defende en Lugo o acollemento familiar como medida de protección á infancia
O director xeral de Familia, Infancia e Dinamización Demográfica, Jacobo Rey, trasladou esta mañá o compromiso da Xunta co acollemento familiar como medida preferente na protección da infancia. Durante o encontro autonómico de familias acolledoras explicou que nestes momentos a comunidade galega é a segunda coas mellores ratios deste modelo.
Jacobo Rey destacou a intensa colaboración entre o Executivo autonómico e as entidades sociais deste ámbito, que permite detectar as necesidades das familias e responder de xeito áxil. Deste xeito, explicou que este mesmo ano a Xunta aumentou as contías económicas para as familias acolledoras, que realizan un traballo fundamental para garantir que os nenos e adolescentes do sistema de protección poidan medrar nun fogar.
O director xeral lembrou que o sistema de protección autonómico é un dos máis integradores e inclusivos, ao tempo que indicou que está formado por pequenos recursos residenciais que seguen as dinámicas dunha vivenda tradicional. Neste sentido, Jacobo Rey fixo fincapé na aposta da Xunta por fomentar o acollemento familiar e que nestes momentos se sitúa xa no 60%.