A Xunta exhibirá preto de 400 debuxos escolares polo 25º aniversario da Muralla como Patrimonio da Humanidade
A Delegación Territorial da Xunta en Lugo exhibirá durante todo o mes de decembro arredor de 400 debuxos realizados por alumnado de distintos centros da cidade para celebrar os 25 anos da declaración da Muralla como Patrimonio da Humanidade.
O delegado territorial, Javier Arias, agradeceu a implicación dos rapaces e dos colexios nesta iniciativa convocada pola Consellería de Cultura, Lingua e Xuventude dentro do programa de actos conmemorativos que se está a desenvolver estes días.
“O propósito é que os máis novos se sintan parte da homenaxe ao monumento máis simbólico de Lugo”, sinalou Arias. Con esa intención, convidouse os nenos e nenas a enviar unha felicitación en formato gráfico —debuxos, pinturas, collage…— baixo o lema A Muralla de Lugo: un desexo, un recordo, unha felicitación.
O delegado destacou a calidade e creatividade dos traballos presentados, que permanecerán expostos ao longo de todo o mes no corredor da planta de entrada do edificio administrativo da Xunta en Lugo, situado na ronda da Muralla.
Arias tamén puxo en valor a boa acollida da programación organizada polo Goberno galego con motivo deste aniversario, na que sobresae a conferencia do escritor Santiago Posteguillo e o concerto da pianista galega Isabel Dobarro, recoñecida co Premio Grammy Latino 2025 ao Mellor Álbum de Música Clásica por Kaleidoscope.