A Xunta inviste 46.000 euros na mellora das residencias xuvenís LUG I e LUG II en Lugo
A Xunta de Galicia destinou 46.000 euros ás últimas melloras realizadas no complexo residencial xuvenil LUG I e no albergue LUG II, situados na rúa Pintor Corredoira de Lugo.
O delegado territorial de Lugo, Javier Arias, e a directora xeral de Xuventude, Lara Meneses, explicaron que as principais actuacións realizáronse no inmoble que acolle o LUG II, onde se renovou o chan de varios cuartos e das zonas comúns, e tamén se pintaron paredes, teitos e a escaleira principal.
No caso da residencia LUG I, os traballos centraronse na adquisición de novo equipamento para a cociña. Este centro conta con 75 prazas e ofrece servizos como comedor, aula de informática con internet, biblioteca, salas de estudo e salón de actos, entre outras instalacións.
Ambos responsables autonómicos destacaron que a Xunta realiza de forma periódica obras de mellora e modernización en ambos edificios para mantelos nas mellores condicións de uso, garantindo a calidade das instalacións para os mozos e mozas que as utilizan.
Entre as actividades que se desenvolven nestas instalacións destacan os campamentos xuvenís promovidos pola Consellería de Cultura, Lingua e Xuventude durante Semana Santa e no verán, así como outros programas educativos e lúdicos que teñen lugar ao longo do ano.